الريفو Rivo ..... وقصه الكفاح !!

 

قصه الكفاح دي اهداء لأي شخص حاسس انه مالوش لازمه في الحياه وفاقد للهويه
ده شريط ريفو
من فتره بسيطه كان سعره ربع جنيه ومكانش حد من الصيادله حاسس بأهميته اطلاقا وكانوا بيطلعوه بواقي فلوس بدل الفكه القرصين بشلن
تخيل لما يكون شريك عمرك اللي انت عايش معاه في نفس الاجزخانه بيعاملك المعامله القذره دي
وكمان ياريت الزبون اللي بياخدك كباقي فلوس بيبقي سعيد بيك
اطلاقا ده تلاقيه اول ما شافك محطوط مكان الشلن او البريزه كشر وزعل وقال للصيدلي ايه ده ريفو
طيب ما تجيب بداله بلاستر جروح او حتي لبان
والصيدلي يقوم ملزقك للزبون بالعافيه زي البت بتاعه طخه بس متموتوش يابوي
بس يا سيدي الريفو لم يستسلم ابدا وفضل يعافر ويعافر لغايه لما بقي بنص جنيه
تفتكر اكتفي ابدا فضل يعافر ويعافر لغايه لما ربنا كرمه من 6 شهور وبقي ب75 قرش
والصيدلي حس بأهميته
ده العلبه منه بقت ب15 جنيه يعني ثروه
قرر انه ميطلعوش خالص كباقي فلوس وبقي يطلع بلاستر جروح مكانه
ناس كتير هتفتكر القصه انتهت لحد هنا
دي ناس محدوده الطموح
الريفو عرف سكه النجاح خلاص
واللي يدوق سكه النجاح بيدمنها
الريفو خطط ونفذ ونجح
وفي ضربه مفاجأه الريفو سعره بقي 2.75 قرش
متخيل يعني سعره زاد 400%
ونظره الصيدلي للريفو اختلفت تماما
وفي صيادله كتير انا اعرفهم خدوا علبه الريفو في حضنهم وهما نايمين
طبعا ما هو ثروه دلوقتي العلبه ب55 جنيه
وفي صيادله عملوا زي ما انا عملت كده وحطوا الريفو في دولاب المخدرات وقفلوا عليه احسن حد يطمع فيه ويسرقه
بس يا سيدي والريفو بقاله 3 ايام حاسس بنشوه فظيعه
لا وتخيل كمان
بقي اللي بيشتري ريفو دلوقتي بيدفع فلوس وياخد بالباقي بلاستر
ودي كانت رحله كفاح شريط الريفو
من شريط مالوش قيمه بنلزقه للزباين بدل الشلن والبريزه
لشريط له قيمه ووضع واللي بيشتريه عليه القوم